TOP 6 arsye për të filluar blogun e hotelit tuaj

Një nga kushtet themelore për një biznes hotelier të pavarur është të kesh faqen tënde të internetit. Në faqen e tyre, hotelet, si dhe llojet e tjera të akomodimit (hostele, apartamente, vila…) duhet ta paraqesin objektin e tyre, të ndajnë informacione me mysafirët e mundshëm dhe të ofrojnë mundësinë e rezervimit.

Kur vendosin se ku do të qëndrojnë në një qytet të caktuar, mysafirët pothuajse gjithmonë do të kontrollojnë praninë online të hotelit. Kjo prani online përfshin faqen tuaj të internetit dhe vlerësimet në kanalet e shitjes. Nëse ofroni përmbajtje dhe këshilla cilësore në faqen tuaj për mysafirët që vijnë në hotelin tuaj, atëherë padyshim që po e përmirësoni pozicionin tuaj në shitje. Çfarë është përmbajtja cilësore dhe pse hotelet kanë nevojë për një blog?

1. Tërheqja e mysafirëve të rinj

Krijimi i një blogu në faqen tuaj, i cili trajton tema me rëndësi për mysafirët dhe për ata që kanë interes për qytetin/vendin tuaj, rrit mundësinë për të arritur mysafirë të rinj. Qofshin individë, familje, çifte apo persona biznesi, kur zgjedhin një destinacion, shumica e njerëzve bëjnë kërkime paraprake për të.

Disa nga pyetjet kryesore që mysafirët duan t'i marrin përgjigje janë padyshim:

• Cilat janë atraksionet turistike të një vendi të caktuar?
• Çfarë e dallon një vend nga të tjerët dhe e bën atë të veçantë?
• Si është kuzhina lokale?
• Historia dhe kultura lokale

Duke i përfshirë këto pyetje në blogun tuaj, ju ofroni përgjigje për të interesuarit dhe krijoni një mundësi për shitje shtesë për t'u ofruar atyre akomodimin tuaj dhe shërbimet e tjera që keni.

2. Keni një histori që duhet ta tregoni

Kjo do të thotë se pas hotelit, vendit apo qytetit tuaj fshihet një histori e caktuar që e bën qëndrimin tuaj të veçantë dhe u ofron mysafirëve një përvojë të re. Qoftë ky një fakt historik, pamja, mënyra si i keni mobiluar dhomat (mobilje të bëra me dorë, teknologji smart home në dhoma, mënyrë eko-miqësore e të bërit biznes etj.), specifikat e ushqimit që serviret në restorant (organik, i bërë në shtëpi, recetë familjare, kuzhinë lokale etj.) apo zbritje të caktuara për festat, tregojeni historinë tuaj.

3. Ndani rregullisht informacione për biznesin tuaj me mysafirët e rregullt

Mysafirët tuaj të rregullt, si dhe ata që ende nuk janë bërë të tillë, duan të kenë informacione të përditësuara për akomodimin e tyre të preferuar. Renovime, meny e re, rritje e kapacitetit, informacione mbi çmimet e netëve dhe shërbimeve të tjera, të gjitha këto duhet të gjejnë vend në faqen e internetit.

Imagjinoni blogun tuaj si një kanal për komunikim të drejtpërdrejtë, jo vetëm me mysafirët individualë, por edhe me konkurrencën dhe me kompanitë dhe organizatat që duan të bashkëpunojnë me ju.

4. Keni një strategji marketingu të zhvilluar

Nëse i lidhni rrjetet tuaja sociale me faqen e internetit, mund të komunikoni në mënyrë të ndërsjellë dhe t'u ofroni mundësi palëve të interesuara.

Kur organizoni një konkurs apo një promocion të veçantë, mund t'i drejtoni lexuesit e blogut tuaj drejt faqes së hotelit në Facebook, Instagram ose Twitter. Gjithashtu, personat që ju ndjekin në rrjetet sociale mund të mbahen rregullisht të informuar për lajmet që trajtoni në blog, duke shpërndarë përmbajtjen direkt me ta.

Secila prej këtyre veprimeve sjell përfitime konkrete për biznesin tuaj, në formën e një promovimi më të mirë dhe një komunikimi më interaktiv me mysafirët. Duke rritur trafikun në blogun e faqes suaj të internetit, rritni mundësinë që mysafirë të rinj të bëjnë rezervim direkt përmes sajtit, duke shmangur kështu koston e komisioneve të kanaleve të shitjes OTA (Booking, Expedia…)

5. Ju ndihmon të rritni bazën tuaj të email-eve

Marketingu me email është një nga strategjitë më të mira për të ruajtur besnikërinë e mysafirëve tuaj dhe ju ndihmon të rritni numrin e rezervimeve. Por një nga problemet kryesore është, si ta rritni bazën e email-eve? Nëse ofroni mjaftueshëm informacion cilësor, histori interesante, dhe mundësi për lexuesit tuaj, atëherë ata patjetër do të duan të regjistrohen në listën tuaj të email-eve. Duhet të ofroni rregullisht informacion mjaftueshëm të larmishëm dhe origjinal për ta rritur atë bazë.

6. Qëndroni në trend

Çdo risi apo trend i ri që shfaqet në vendin tuaj, ose që lidhet në ndonjë mënyrë me biznesin tuaj dhe që intereson mysafirët, duhet të përfshihet në blogun tuaj. A ka ndonjë ngjarje botërore, festival apo eveniment sportiv të organizuar në qytetin tuaj? Shpjegoni pse vizitorët e atij eventi duhet të qëndrojnë tek ju.

Gjithashtu, çështje si ruajtja e shëndetit publik, p.sh. për shkak të pandemisë së koronavirusit Covid-19, duhet të komunikohen qartë nga ana juaj. Çfarë hapash po ndërmerrni për të mbrojtur mysafirët tuaj? Çfarë masash keni marrë për të mbrojtur punonjësit tuaj? Cilat janë planet tuaja për periudhën e ardhshme për të përmirësuar kushtet higjienike? Përgjigjet ndaj këtyre pyetjeve kanë rëndësi të madhe për mysafirët e mundshëm, në mënyrë që të ndihen të sigurt kur zgjedhin hotelin apo akomodimin ku duan të qëndrojnë.